نلسون ماندلا

سن اولمزسن

حقیقتین آیناسی هئچ زامان اولمز

 

سن اولمزسن

داغین زیروه سی هئچ زامان اولمز

 

سن اولمزسن

عیدالتین شعری هئچ زامان اولمز

 

سن اولمزسن

آزادلیقین ماهناسی هئچ زامان اولمز

 

سن اولمزسن

آفریقا هئچ زامان اولمز

 

 

بوغدالیقدا ساری سونبول ایسته میر سنسیز قالسین

گویده دورنا ایسته میر سنسیز قالسین

آیدا آلما ایسته میر سنسیز قالسین

دنیزده دالغا ایسته میر سنسیز قالسین

اورکده سئوگی ایسته میر سنسیز قالسین

دونیادا حقیقت ایسته میر سنسیز قالسین

هارا گئدیرسن ایلدیریمین باغچاسی؟

 

بیزه اویرت:نیفرتدن سئو گی یاراتماقی

بیزه اویرت:زنجیردن انجیر درمه نی

بیزه اویرت:سیلدیریمدا بولاغ گورمه نی

بیزه اویرت:گونشه ساریشمانی

بیزه اویرت:آیین آندینی اوپمه نی

بیزه اویرت:آفریقانی سئومه نی

هارا گئدیرسن آفریقانین جنگلی؟

 

         تیراختور

داغدا جیران آختاریرام

جیرانین آدی تیراختوردو

 

باغدا بولبول اوخور

بولبولون آدی تیراختوردو

 

گویدن اولدوز یاغیر

اولدوزون آدی تیراختوردو

 

اورکلر چیچکلنیب  

چیچگین آدی تیراختوردو

 

کوینگی بابکین کوینگیدی

آمما آدی تیراختوردو

 

حریتین اجاقیدی

آمما آدی تیراختوردو

 

آذربایجان چیراغیدی

آمما آدی تیراختوردو

 

قولاغین گئتی یاخینا:

آشقیمین آدی تیراختوردو 

 

            سون تاپشیریق

سو دئییبدیر منه اولده آنام آب کی یوخ

یوخو اویرتدی اوشاقلیقدا منه خواب کی یوخ

 

ایلک دفعه کی چورک وردی منه نان دئمه دی

ازلیندن منه دوزدانه نمکدان دئمه دی

 

آنام اختر دئمه ییبدیر منه اولدوز دئییب او

سو دوناندا ،دئمه ییب یخدی بالا بوز دئییب او

 

قار دئییب برف دئمه ییب ،دست دئمه ییب ال دئییب او

منه هئچواقت بیا سویله مه ییب گل دئییب او

 

یاخشی خاطیرلاییرام یاز گونو آخشام چاغی لار

باغچانین گون باتانینداکی ،ایلیق گون یاییلار

 

گل دئیردی ... داراییم باشیوی ای نازلی بالام

گلمه سن گر باجووون آستاجا زولفون دارارام

 

او دئمزدی کی ؛بیا شانه زنم بر سر تو

گر نیایی بزنم شانه سر خواهر تو

 

بلی داش یاغسادا گویدن سن اوسان من ده بویام !

وار سنین باشقا آنان ، واردی منیم باشقا آنام

 

اوزومه مخصوص اولان باشقا ائلیم واردی منیم

ائلیمه مخصوص اولان باشقا دیلیم واردی منیم

 

ایسته سن قارداش اولاق بیر یاشایاق ، بیرلیک ائدک

وئریبن قول-قولا بوندان سورا بیر یولدا گئدک

 

اولا ، اوزگه کولک لرله گرک اسمه یه سن

ثانیا ، وارلیغیما خالقیما خور باخمایاسان

 

یوخسا گر زور دئیه سن میللتیمی خوار ائده سن

گون گلر صفحه چونر مجبور اولار سان گئده سن!

 

                                                  مرحوم پرفئسور زهتابی

 

............................................................

پرفئسور محمد تقی زهتابی (شبسترلی کیریشچی) 21 آذر – 1325 –جی ایلده

23 یاشیندا بو شعری یازیب. اوستاد زهتابی 21 آذر 1302 اینجی ایلی آنادان اولوب ، 1377 – ایل دونیایا گوز یومدو.

.....................................................................................

  قایناق:تانری داریخیر؛ گونئی آذربایجان موقاویمت شعر آنتولوژیسی

حاضیرلایانی، سعید موغانلی.

 

گون چیخدی اولدوزلاری دوشوردو

گون چیخدی چیچکلری گولدوردو

گون چیخدی ماراللاری هورکوتدو

 

بیردن بیره گوردوم

دونیا دوشوب گونشین الینه

گوزلدره

..............................................

..............................................

..............................................

مه گلمیشدی

گوللرین سوئو داشیردی

 

مه گلمیشدی

باغلار پیچیلداشیردی

 

مه گلمیشدی

سونبوللر قایناشیردی

 

بیردن بیره گوردوم

اریک لر سارالیب

گوزلدره

...............................

...............................

...............................

بولاغ گلدی گئجه نین تئلین تارادی

بولاغ گلدی نوروزگولون سانادی

بولاغ گلدی باغچالاری آرادی

 

بیردن بیره گوردوم

سو قیزیل گولو آپاریر

گوزلدره

..........................................

..........................................

..........................................

بیلمدیم نجور اولدو آزا آلازلاندی

بیلمدیم نجور اولدو اوجاق آلوولاندی

بیلمدیم نجور اولدو کوتوک اودلاندی

 

بیردن بیره گوردوم

چاینیک داشیر

گوزلدره

...............................................

...............................................

...............................................

بیلمدیم نجور اولدو آرپانین باشی سارالدی

بیلمدیم نجور اولدو آلمانین اوزو قیزاردی

بیلمدیم نجور اولدو گیلاسین قاشی قارالدی

 

بیرن بیره گوردوم

سارماشیق منه ساریشیب

گوزلدره

......................................................

......................................................

......................................................

 

هئچ بیلمدیم ناواخ بوغدا اکیلدی

هئچ بیلمدیم ناواخ یونجا بیچیلدی

هئچ بیلمدیم ناواخ خرمن سورولدو

 

بیردن بیره گوردوم تلیس لرین آغزی تیکیلدی

گوزلدره

..........................................................

..........................................................

..........................................................

آقشام چاغی ایدی

یاغیش یاغدی قانیما

 

آقشام چاغی ایدی

اولدوز آخدی جانیما

 

آقشام چاغی ایدی

ایلدیریم دوشدو باشیما

 

بیردن بیره گوردوم

 اود توکولدو داماریما

گوزلدره